Psa 112 | SnaBDSC | STEP | Rumbidzai Jehovha. Akaropafadzwa munhu anotya Jehovha, anofarira mirayiro yake zvikuru.

Psalms 112

1 Rumbidzai Jehovha.

Akaropafadzwa munhu anotya Jehovha,
anofarira mirayiro yake zvikuru.

2 Vana vake vachava nesimba panyika;
zvizvarwa zvavakarurama zvicharopafadzwa.
3 Pfuma nezvakawanda zviri mumba make,
uye kururama kwake kunogara nokusingaperi.
4 Kunyange murima akarurama anobudirwa nechiedza,
iye munhu ane nyasha nengoni uye akarurama.
5 Zvakanaka zvinouya kumunhu anopa zvizhinji
uye anokweretesa pachena, anofambisa nzira dzake nokururamisira.
6 Zvirokwazvo, haangatongozungunuswi;
munhu akarurama acharangarirwa nokusingaperi.
7 Haangatyi mashoko akaipa;
mwoyo wake wakasimba, anovimba naJehovha.
8 Mwoyo wake wakachengetedzeka, haangatyi chinhu;
pakupedzisira achatarira nokukunda kuvavengi vake.
9 Akaparadzira zvipo zvake kuvarombo,
kururama kwake kunogara nokusingaperi;
runyanga rwake ruchasimudzwa mudenga mukukudzwa.

10 Akaipa achazviona uye acharwadziwa,
acharumanya meno ake uye achaonda;
kushuva kwowakaipa kuchava pasina.